ABŞ İranda vurulmuş təyyarənin hər iki ekipaj üzvünü xilas edib: təfərrüatlar

Prezident Donald Trump bildirdi ki, İran tərəfindən vurulan F-15E qırıcı təyyarəsinin ikinci ekipaj üzvü də sağ-salamat tapılıb.

Təyyarə İran tərəfindən aprelin 3-də bu ölkənin üzərində, Arak ağır su reaktoru yaxınlığında vurulmuş və ekipaj üzvləri paraşütlə İran ərazisinə enmişdilər. F-15E təyyarəsinin ekipajı iki hərbi qulluqçudan ibarətdir: pilot və silah sistemləri zabiti.

Vurulmuş F-15E ekipajının xilas edilməsi müxtəlif şəraitdə həyata keçirilən iki ayrı əməliyyatdan ibarət olub. Pilot aprelin 3-də, qəza baş verdikdən təxminən yeddi saat sonra tapılıb. O, Kohgiluyeh və Boyer-Əhməd vilayətinin cənub-qərbində, Dehdəşt şəhəri yaxınlığında aşkar edilib. O, gündüz vaxtı iki HH-60W Jolly Green II helikopteri tərəfindən nisbətən əlçatan ərazidə tapılıb.

Silah sistemləri zabiti, polkovnik rütbəli yüksək vəzifəli hərbçi, daha uzaq məsafədə tapılıb. O, ya küləyin paraşütü hərəkət etməsi səbəbindən qəza yerindən uzaqlaşıb, ya da tutulmamaq üçün məqsədli şəkildə hərəkət edib. Zabit İsfahanın cənubunda 2100 hündürlükdə, dağ yarğanında gizlənib. İki ekipaj üzvü bir-birindən təxminən 150 km məsafədə olub və bu, çətin relyefdə iki ayrı döyüş axtarış və xilasetmə əməliyyatının aparılmasını tələb edib.

ABŞ Xüsusi Əməliyyat Qüvvələri ikinci ekipaj üzvünü xilas etmək üçün həmin ərazidə müvəqqəti eniş zonası yaradaraq qısa müddətli uçuş zolağı təşkil ediblər. Həmçinin, hava zolağında ön əməliyyat bazası qurulub. Bu baza xilasetmə əməliyyatının koordinasiyası, şəxsi heyətin yerləşdirilməsi və bir neçə saat ərzində hava fəaliyyətinin dəstəklənməsi üçün istifadə olunub.

Xilasetmə əməliyyatı zamanı iki MC-130J nəqliyyat təyyarəsi və ən azı bir helikopter itirilib. Məlumatlara görə, eniş zolağı çox da uğurlu olmayıb - yumşaq, qumlu torpaqlı olub. Nəticədə iki nəqliyyat təyyarəsi endikdən sonra quma bataraq hərəkətsiz vəziyyətdə qalıb və havaya qalxa bilməyib. Bu təyyarələri İranın əlinə keçməməsi üçün ABŞ-ın özü məhv edib.

Bütövlükdə əməliyyat ABŞ qüvvələrinin İran ərazisinin dərinliklərində fəaliyyət göstərə bildiyini nümayiş etdirir. Bu vəziyyət, xüsusilə raket, nüvə və hərbi infrastruktur baxımından mühüm ərazi olan İsfahan yaxınlığında İranın sürətli reaksiya və hava məkanına nəzarət imkanlarında müəyyən məhdudiyyətlərin olduğunu göstərir.

Əməliyyat həmçinin göstərir ki, ABŞ İranın mərkəzi bölgələrində xüsusi təyinatlı qüvvələri çıxara və məsələn, yeraltı raket bazalarına canlı qüvvə ilə hücum həyata keçirə bilər. Bu, həmçinin texniki itkilərə baxmayaraq, ABŞ ordusunun uzun məsafəli əməliyyatlar aparmaq və şəxsi heyətini düşmən mühitindən çıxarmaq qabiliyyətinə malik olduğunu nümayiş etdirir.

The Daily Baku redaksiyası