Azərbaycan neft məhsullarının Ermənistana tranziti üçün Gürcüstanla razılıq əldə edilib

Azərbaycanın xarici işlər naziri Ceyhun Bayramov 2025-ci il dekabrın 26-da keçirdiyi mətbuat konfransında Azərbaycan neft məhsullarının Ermənistana tranziti üçün Gürcüstanla razılıq əldə edildiyini bildirib. Daha sonra Ermənistanın iqtisadiyyat naziri Qevorq Papoyan da bu məsələdə razılığın əldə olunduğunu qeyd edərək, tranzit xərclərinin rəqabətqabiliyyətli olduğunu vurğulayıb.

Xatırladaq ki, Gürcüstan əvvəlcə Azərbaycan neft məhsullarının Ermənistana tranziti üçün qeyri-real dərəcədə yüksək tarif tələb etmiş, daha sonra isə ilk qatarı istisna olaraq heç bir rüsum almadan öz ərazisindən Ermənistana buraxmışdı. Gürcüstanın yaratdığı maneələr məlum olduqdan sonra Ermənistan hökumətinin nümayəndələri Azərbaycan neft məhsullarının Qazaxdan avtomobillərlə Ermənistana daşınması variantını gündəmə gətirmişdilər. Görünür, Gürcüstan tərəfi tranzit üçün normal qiymətlər təklif etmədiyi təqdirdə Azərbaycan və Ermənistan arasında birbaşa nəqliyyat əlaqələrinin bərpa olunmasının sürətlənə biləcəyini nəzərə alıb.