Deputat: Zatulin kimi siyasətçilərin təxribatçı bəyanatları regionda heç bir nəticə verməyəcək

Moskvada keçirilən son Paşinyan–Putin görüşündən sonra rusiyalı deputat Konstantin Zatulinin səsləndirdiyi fikirlər qərəzli və təxribat xarakterlidir.

Buhu “The Daily Baku”ya açıqlamasında Tural Gəncəliyev bildirib.

Onun sözlərinə görə, bu cür bəyanatlar əslində regionla bağlı destruktiv yanaşmanın göstəricisidir və müəyyən siyasi dairələrin mahiyyətini açıq şəkildə ortaya qoyur:

“Komsomolskaya pravda " dərc edilən, Zatulin tərəfindən səsləndirilən fikirlər Azərbaycan dövlətinə, onun ərazi bütövlüyünə, suverenliyinə və siyasi rəhbərliyinə qarşı yönəlmiş açıq təxribatdır. Bu cür yanaşmalar nə beynəlxalq hüquqa, nə də regionda formalaşmış yeni reallıqlara uyğun gəlir”.

Deputat qeyd edib ki, Qarabağ məsələsi ilə bağlı səsləndirilən iddialar tamamilə əsassızdır:

“Rusiya da daxil olmaqla beynəlxalq ictimaiyyət Qarabağı Azərbaycanın ayrılmaz tərkib hissəsi kimi tanıyıb. Bu, həm BMT Təhlükəsizlik Şurasının qətnamələrində, həm də ikitərəfli sənədlərdə açıq şəkildə əks olunub. Bu reallığı görməmək və ya inkar etmək yalnız siyasi savadsızlıq və qərəz göstəricisidir”.

Tural Gəncəliyev vurğulayıb ki, Rusiya ilə Ermənistan arasında münasibətlərdə yaranan gərginlik fonunda Azərbaycanın adının bu kontekstdə hallandırılması yolverilməzdir:

“Əgər bu iki ölkə arasında müəyyən problemlər və qarşılıqlı ittihamlar mövcuddursa, bunun Azərbaycanla əlaqələndirilməsi qəbuledilməzdir. Bu, həm siyasi etikaya ziddir, həm də məqsədli şəkildə regionda gərginlik yaratmağa yönəlib”.

Deputatın fikrincə, bu cür bəyanatlar əslində müəyyən siyasi dairələrin köhnə yanaşmalarından əl çəkmədiyini göstərir:

“Uzun illər region xalqlarını qarşı-qarşıya qoymaq siyasəti yürüdən belə siyasətçilər artıq anlamalıdır ki, bu dövr geridə qalıb. Ermənistanın Azərbaycana qarşı alət kimi istifadə edilməsi siyasəti də artıq iflasa uğrayıb”.

O əlavə edib ki, Azərbaycan artıq post-münaqişə dövründə yeni reallıqlar formalaşdıran və regionda sülh gündəmini irəli aparan əsas aktordur:

“Azərbaycan güclü lideri, güclü ordusu və vahid mövqeyi ilə işğala son qoydu və regionda yeni geosiyasi reallıq yaratdı. Bu reallıqları dəyişmək cəhdləri nəticəsiz qalacaq”.

Sonda Tural Gəncəliyev bildirib ki, bu kimi bəyanatlar yalnız onların müəlliflərinin siyasi mahiyyətini ifşa edir:

“Zatulin kimi şəxslərin səsləndirdiyi fikirlər Azərbaycan–Ermənistan münasibətlərinə xələl gətirmək, düşmənçilik yaratmaq məqsədi daşıyır. Lakin bu cür cəhdlər heç bir nəticə verməyəcək. Əksinə, bu yanaşmalar həmin siyasətçilərin özlərini ifşa etməsinə və region ölkələrinin onlardan daha da uzaqlaşmasına səbəb olur”.