Ekspert: Naxçıvana qarşı hər hansı təhlükə ümumilikdə Cənubi Qafqazın geosiyasi balansı baxımından ciddi nəticələr doğura bilər

Naxçıvan Muxtar Respublikasında baş verən son hadisə Cənubi Qafqazda təhlükəsizlik balansına təsir göstərə biləcək ciddi siqnallardan biri kimi qiymətləndirilməlidir.

Bunu “The Daily Baku”ya açıqlamasında Türk ekspert Mehmet Emir Aksoy bildirib.

Onun sözlərinə görə, martın 5-də Azərbaycan Müdafiə Nazirliyinin yaydığı məlumata əsasən İran ərazisindən göndərildiyi ehtimal olunan pilotsuz uçuş aparatları Naxçıvan Beynəlxalq Hava Limanı və bəzi mülki infrastruktur obyektlərini hədəfə alıb. Ekspert qeyd edib ki, hücumda istifadə olunan dronların texniki xüsusiyyətləri və əməliyyatın detalları hələ araşdırılsa da, ilkin məlumatlar hadisənin təhlükəli xarakter daşıdığını göstərir.

“Burada xüsusilə diqqət çəkən məqam ondan ibarətdir ki, hədəf alınan obyektlər hərbi infrastruktura deyil, mülki infrastruktura aiddir. Bu isə hadisənin təkcə taktiki hərbi addım olmadığını, eyni zamanda siyasi mesaj daşıdığını göstərir,” – deyə Mehmet Emir Aksoy vurğulayıb.

“Naxçıvana qarşı hər hansı təhlükə yalnız Azərbaycanın təhlükəsizliyi baxımından deyil, ümumilikdə Cənubi Qafqazın geosiyasi balansı baxımından da ciddi nəticələr doğura bilər,” – deyə ekspert vurğulayıb.

O qeyd edib ki, Azərbaycan Müdafiə Nazirliyi hadisə ilə bağlı açıqlamasında məsuliyyətin İran tərəfinə aid olduğunu açıq şəkildə ifadə edib və ölkənin təhlükəsizliyinin təmin edilməsi üçün zəruri tədbirlərin hazırlandığını bildirib. Ekspertə görə, bu mesaj Rəsmi Bakının öz suverenliyini və ərazi bütövlüyünü qorumaq məsələsində qətiyyətli mövqe tutduğunu göstərir.

“Cənubi Qafqaz hazırda çox həssas geosiyasi mərhələdən keçir. Belə bir dövrdə atılan provokativ addımlar yalnız ikitərəfli münasibətləri gərginləşdirmir, həm də regionun təhlükəsizlik arxitekturasını sarsıda bilər,” – deyə Mehmet Emir Aksoy bildirib.

Ekspert sonda vurğulayıb ki, Azərbaycanın mövqeyi aydındır: ölkənin suverenliyinə və təhlükəsizliyinə yönələn hər hansı hücum cavabsız qalmayacaq.