Gülşən Rzayeva davamlı şəhər inkişafı məsələlərindən danışıb

Yeni Şəhər Gündəliyi 2036-cı ilə qədər milli inkişaf strategiyalarına, iqlim fəaliyyəti siyasətlərinə və iqtisadi planlaşdırma proqramlarına tam şəkildə inteqrasiya olunmalıdır.

Bunu Dövlət Şəhərsalma və Arxitektura Komitəsinin Aparat rəhbərinin müavini, Bakıda keçirilən Ümumdünya Şəhərsalma Forumunun 13-cü sessiyasının (WUF13) milli əlaqələndiricisinin müavini Gülşən Rzayeva WUF13 çərçivəsində təşkil olunmuş "Qlobal Mənzil Böhranı: Plan Nədir?" adlı tədbirdə bildirib.

Onun sözlərinə görə, Azərbaycan üçün iqlimə davamlılıq və inklüziv urbanizasiya əsas milli prioritetdir: "Bu, bizim fəal qlobal fəaliyyətimizi şərtləndirən amildir. Beləliklə, şəhərlərin insan mərkəzli və insan yönümlü olmasını təmin etmək üçün planlaşdırma proseslərimizdə burada vurğulanan bütün prinsiplər əsas götürülür. Ümumiyyətlə, Yeni Şəhər Gündəliyinin növbəti onillikdə, yəni 2036-cı ilə qədər icrası üçün o, milli inkişaf strategiyalarına, iqlim fəaliyyəti siyasətlərinə və iqtisadi planlaşdırma proqramlarına tam şəkildə inteqrasiya olunmalıdır. Daha güclü institusional əməkdaşlıq mütləq şəkildə zəruridir. Hökumətlər, bələdiyyələr, beynəlxalq maliyyə qurumları, özəl sektor və icmalar uzunmüddətli tərəfdaşlıqlar vasitəsilə birlikdə işləməlidirlər. Maliyyələşdirmə sistemləri davamlı olmalı və ölçülə bilən nəticələr fəaliyyətimizə rəhbərlik etməlidir. Monitorinq mütləq ən vacib aspektlərdən biridir – burada hədəflər və monitorinq sistemləri nəzərdə tutulur".