Mənzil məsələsində sosial ədalət mövzusu gündəmə gətirilib

Dünyada bir çox ölkə mənzili hüquq deyil, imtiyaz kimi qəbul edir və bu yanaşma yoxsul insanların qeyri-rəsmi yaşayış məntəqələrinə üz tutmasına səbəb olur.

"The Daily Baku" xəbər verir ki, bunu Gecəqondu Sakinlərinin Beynəlxalq Təşkilatının xüsusi nümayəndəsi Rose Molokoane Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində "Davamlı mənzil və dayanıqlı şəhərlər üçün ən yaxşı həll yollarının axtarışında: Şəhərlərin səsləri" adlı tədbirdə deyib.

O, çıxışı zamanı mənzili iki fərqli istiqamətdə dəyərləndirdiyini deyib: "Formal mənzil və qeyri-rəsmi mənzil anlayışları var. Formal mənzil daha çox imkanı olan insanlar üçün nəzərdə tutulur. Qeyri-rəsmi yaşayış isə ailəsini qorumaq üçün sığınacaq axtaran yoxsul insanların seçimidir. Sosial mənzil yalnız yaşayış məsələsi deyil, həm də icmaların birliyi və sosial həmrəyliyidir. Biz yoxsul insanların torpaq və mənzil hüquqlarının eşidilməsi üçün tərəfdaşlıqlar qururuq. Məqsədimiz qarşıdurma yaratmaq deyil, insanların səsinin eşidilməsinə nail olmaqdır".

R.Molokoane bildirib ki, hökumətlərin mənzil siyasətləri çox vaxt praktik nəticə vermir: "Bəzi siyasətlər çox gözəl görünür, amma reallıqda işlək olmur. Biz yoxsul insanların real ehtiyaclarına cavab verən mənzil siyasəti görmək istəyirik. İnsanlara torpaq əldə etmək və öz evlərini tikmək imkanı yaradıldıqda "xalqın mənzil prosesi" formalaşır və bu, sosial-iqtisadi inkişafı sürətləndirir. Təkcə danışmaq yox, hərəkət etmək lazımdır. Fəaliyyət, fəaliyyət və yenə fəaliyyət çox vacibdir. Birlikdə çalışsaq, sosial mənzil insanları bir araya gətirəcək və bu prosesdə iqtisadi imkanlar yaranacaq".