Nazir müavini: Orqan transplantasiyası sistemi elektronlaşdırılır

Azərbaycanda orqan transplantasiyası sahəsində mövcud sistemin elektronlaşdırılması istiqamətində işlər davam etdirilir.

"The Daily Baku" xəbər verir ki, bunu Səhiyyə nazirinin müavini Nadir Zeynalov bunu “Qafqazda ilk ürək transplantasiyası: Azərbaycan səhiyyəsinin tarixi nailiyyəti və gələcək perspektivlər” mövzusunda keçirilən dəyirmi masa zamanı bildirib.

Nazir müavini qeyd edib ki, orqan transplantasiyası üçün mövcud gözləmə siyahısının və bu sahədə tətbiq olunan xüsusi mexanizmlərin vahid elektron sistemə inteqrasiyası məqsədilə müəyyən addımlar atılıb. Onun sözlərinə görə, hazırda ölkədə transplantasiya prosesi sistemli şəkildə həyata keçirilir, gözləmə siyahısı formalaşdırılır və xüsusi mexanizmlərdən istifadə olunur. Yaxın qohum olmayan şəxslərin orqan donoru olması üçün Koordinasiya Mərkəzi fəaliyyət göstərir. Bununla yanaşı, bütün bu mexanizmlərin elektronlaşdırılması istiqamətində işlər görülsə də, proses hələ tam başa çatmayıb.

Nadir Zeynalov Azərbaycanda orqan transplantasiyasına tələbatın yüksək olduğunu da diqqətə çatdırıb. O bildirib ki, aparılan əməliyyatların sayı gözləmə siyahısında olan pasiyentlərin sayını azaltmaq üçün kifayət etmir. Nazir müavini ümid etdiyini vurğulayıb ki, gələcəkdə orqan donoru olmaq istəyənlərin sayı artacaq və bu, gözləmə siyahısında olan şəxslər üçün ümid yaradacaq.

Səhiyyə nazirinin müavini çıxışında tibbin gələcək inkişaf perspektivlərinə də toxunub. Onun sözlərinə görə, elmi tərəqqi nəticəsində uzaq gələcəkdə transplantasiya əməliyyatlarına ehtiyacın azalması ehtimalı mövcuddur. Lakin bu mərhələ hələlik çox uzaq perspektiv kimi qiymətləndirilir.