Oğrular Alman bankının seyfinə girərək milyonlarla avro ələ keçiriblər

“The Daily Baku” xəbər verir ki, İstintaqın məlumatına görə, oğrular Almaniyanın qərbində yerləşən Gelsenkirxen şəhərindəki Sparkasse bankının filialında qalın dəmir-beton divarı deşiblər. İçəri daxil olduqdan sonra onlar minlərlə depozit qutusunu sındıraraq on milyonlarla avro dəyərində qiymətli əşyaları aparıblar.

Almaniyada mağazaların və bankların əksəriyyəti dekabrın 24-ü axşamından etibarən bağlandığı üçün oğurluq hadisəsi yalnız bazar ertəsi, dekabrın 29-u səhər tezdən yanğın siqnalizasiyası işə düşəndən sonra aşkar edilib.

Çərşənbə axşamı onlarla qəzəbli müştəri bankın qarşısına toplaşaraq ucadan “Bizi içəri buraxın!” deyə şüarlar səsləndirib. Müştərilərdən biri Welt telekanalına bildirib ki, gecə boyu yata bilməyib və 25 il ərzində istifadə etdiyi seyf qutusunda yaşlılıq dövrü üçün yığdığı vəsaiti saxlayıb. Digər bir şəxs isə seyfdə ailəsinə məxsus nağd pul və zinət əşyalarını saxladığını deyib.

Gelsenkirxendəki Sparkasse bankının nümayəndəsi şərh üçün edilən müraciətə dərhal cavab verməyib.

Polisin bildirdiyinə görə, şahidlər şənbə gecəsi yaxınlıqdakı parkinq qarajının pilləkənlərində iri çantalar daşıyan bir neçə şəxsi görüblər. Həmçinin bazar ertəsi səhər tezdən qarajdan maskalı şəxslərin olduğu qara rəngli Audi RS 6 avtomobilinin çıxdığı barədə məlumatlar daxil olub. Polis əlavə edib ki, avtomobilin nömrə nişanı Gelsenkirxendən 200 kilometrdən çox şimal-şərqdə yerləşən Hannover şəhərində oğurlanmış maşına məxsus olub.