Pakistan rəsmisi Azərbaycandakı mərkəzin fəaliyyətini yüksək qiymətləndirib

Pakistanın İnsan Hüquqları Nazirliyinin katibi Əbdül Xaliq Şeyx Azərbaycan Dillər Universitetində fəaliyyət göstərən mərkəzi ziyarət edib.

"The Daily Baku" xəbər verir ki, pakistanlı rəsmi mərkəzin fəaliyyəti ilə yerində tanış olub və tələbələrin prosesə yüksək maraq göstərdiyini qeyd edib.

Əbdül Xaliq Şeyx bildirib ki, bu cür təşəbbüslər iki ölkə arasında humanitar və mədəni əlaqələrin inkişafına mühüm töhfə verir.

“Sizi ziyarət etmək və fəaliyyətinizlə yerində tanış olmaq bizim üçün böyük şərəfdir. Biz geri qayıtdıqdan sonra Pakistan hökumətinə bu mərkəzə, eləcə də İslamabadda Müasir Dillər Milli İnstitutunda Azərbaycan dilinin, mədəniyyətinin və elminin təşviqi ilə məşğul olan digər mərkəzlərə dəstəyin artırılması ilə bağlı tövsiyələrimizi çatdıracağıq”, – deyə o qeyd edib.

Qeyd edək ki, Əbdül Xaliq Şeyx uzun illərdir siyasi fəaliyyətlə məşğuldur. O, siyasətə tələbəlik illərində qoşulub və hazırda Pakistanda hakimiyyətdə olan siyasi partiyanın üzvüdür. Bu, onun beşinci müddətidir.

Bundan əvvəl o, Pakistanın ən böyük vilayəti olan Pəncabda Uşaq Müdafiəsi Bürosunun rəhbəri vəzifəsində çalışıb. Hazırda isə parlament üzvü olmaqla yanaşı, İnsan Hüquqları Nazirliyində parlament katibi kimi fəaliyyət göstərir.

Pakistanlı rəsmi Azərbaycanın paytaxtı barədə ilk təəssüratlarının müsbət olduğunu bildirib.

Onun sözlərinə görə, şəhər səliqəli, təmiz və yaxşı təşkil olunmuş təsir bağışlayır.

Əbdül Xaliq Şeyx Azərbaycanın müsəlman ölkəsi olmasına baxmayaraq, açıq fikirli, liberal və müasir cəmiyyət modelinə malik olmasını xüsusi vurğulayıb.

O, qadınların cəmiyyətdə fəal iştirakını da yüksək qiymətləndirib. Bildirib ki, işçi qüvvəsində qadınların payı təxminən 50 faiz təşkil edir və onlar cəmiyyətin bütün sahələrində aktiv rol oynayırlar.

Pakistanlı rəsmi qadınların iqtisadi və xüsusilə təhsil sahəsində iştirakının təsiredici olduğunu qeyd edərək, Azərbaycanın bu baxımdan Türkiyəyə bənzədiyini bildirib.

Sonda o vurğulayıb ki, mədəni davamlılıq və tarixi irsin qorunması bütün müsəlman xalqları üçün mühüm əhəmiyyət daşıyır.