Pentaqon: ABŞ NATO ilə əməkdaşlığı asılılıq yox, tərəfdaşlıq əsasında qurmaq istəyir

ABŞ-ın müharibə nazirinin müavini Elbric Kolbi Avropa ilə ABŞ arasında Şimali Atlantika Alyansı çərçivəsində əməkdaşlığın yeni mərhələyə keçməli olduğunu bildirib.

"The Daily Baku" xəbər verir ki, Kolbi bu fikirləri NATO-nun Baş Qərargahında keçirilən alyansın müdafiə nazirlərinin iclasından əvvəl jurnalistlərə açıqlamasında səsləndirib.

Onun sözlərinə görə, Avropa və ABŞ-ın NATO çərçivəsində birgə fəaliyyəti asılılıq prinsipi deyil, bərabərhüquqlu tərəfdaşlıq əsasında qurulmalıdır və bu, yeni “NATO 3.0” versiyasının formalaşmasına gətirib çıxarmalıdır.

Kolbi qeyd edib ki, 2025-ci ildə ABŞ Prezidenti və NATO-nun Baş katibinin liderliyi ilə alyans daxilində yenidən qiymətləndirmə aparılıb, Avropanın NATO-nun ənənəvi müdafiəsinə rəhbərlik etməsi ideyasına real və səmimi bağlılıq yaranıb.

Pentaqon rəhbərinin müavini əlavə edib ki, NATO-nun tərəfdaşlıq üzərində qurulmuş “NATO 3.0” modelinə keçidi təşkilatın ilkin məqsədinə qayıdışı ifadə edəcək.