Qırğızıstanda Novruz: Azərbaycanlılar milli irsi nümayiş etdirdi -FOTO

Qırğızıstanda yaşayan azərbaycanlılar Novruz bayramı münasibətilə ölkə üzrə təşkil olunan tədbirlərdə fəal iştirak ediblər.

“The Daily Baku” xəbər verir ki, martın 21-i Qırğızıstanda da rəsmi şəkildə Novruz bayramı kimi qeyd olunur və bu münasibətlə ölkənin müxtəlif bölgələrində genişmiqyaslı tədbirlər keçirilib. Paytaxt Bişkek şəhərində əsas bayram tədbirləri Ala-Too meydanı ətrafında təşkil olunub.

Burada konsert proqramları təqdim edilib, milli musiqilər səsləndirilib, həmçinin müxtəlif idman yarışları və ənənəvi çıxışlar nümayiş etdirilib. Novruz şənlikləri yalnız qırğız xalqının deyil, ölkədə yaşayan müxtəlif etnik icmaların birgə iştirakına səhnə olub.

Özbəklər, qazaxlar, taciklər, dunqanlar, koreyalılar, almanlar, ruslar, ukraynalılar, çeçenlər, qaraçaylar, ahıska türkləri və azərbaycanlılar daxil olmaqla onlarla millətin nümayəndələri bayramı birlikdə qeyd ediblər. Qırğızıstandakı azərbaycanlı icması Bişkeklə yanaşı, Kant şəhərində, Aravan rayonunda və Lenin kəndində də bayram tədbirlərində aktiv iştirak edib. Azərbaycanlılar tərəfindən qurulan xüsusi stendlərdə milli geyimlər, ənənəvi şirniyyatlar və mədəni irs nümunələri sərgilənib.

Qeyd edək ki, Qırğızıstanda təxminən 20 minə yaxın azərbaycanlı yaşayır. Bu icmanın böyük hissəsini Sovet İttifaqı dövründə Mərkəzi Asiyaya köçürülmüş azərbaycanlıların nəsilləri təşkil edir.