Zelenski Rusiyadakı strateji obyektlərə hücumlar barədə açıqlama verib

Ukrayna Prezidenti Volodimir Zelenski ötən gecə Rusiyanın Peterburq neft terminalına zərbə endirildiyini təsdiqləyib.

"The Daily Baku"nun məlumatına görə, o, bu barədə sosial şəbəkələrdə yazıb.

Zelenskinin sözlərinə görə, ötən gecə Ukrayna qüvvələri "uzaqmənzilli sanksiyalar" strategiyası çərçivəsində Rusiya ərazisindəki bir sıra mühüm obyektlərə zərbələr endiriblər.

Ukrayna Prezidenti qeyd edib ki, vurulmuş hədəflər arasında Peterburq neft terminalı da olub. Onun sözlərinə görə, Ukraynanın dövlət sərhədindən obyektə qədər məsafə təxminən 1 100 kilometrdir.

Zelenski həmçinin Kronştadtdakı bazada hərbi obyektlərin və Tambov vilayətində silah istehsalı müəssisəsinin vurulduğunu açıqlayıb.

"Ukraynanın uzaqmənzilli sanksiyalar planı sülhün yaxınlaşdırılması üçün lazım olduğu qaydada həyata keçirilir", - o vurğulayıb.