Vaşinqton Hörmüz boğazındakı vəziyyətlə bağlı diplomatik məsləhətləşmələr aparır

Ağ Evin rəhbəri Donald Tramp əmindir ki, BMT Hörmüz boğazından normal gəmiçiliyin bərpa edilməsində və regionda vəziyyətin sabitləşməsində mühüm rol oynaya bilər.

"The Daily Baku" xəbər verir ki, bu barədə "Fox News" telekanalının efirində ABŞ-nin ümumdünya təşkilatındakı daimi nümayəndəsinin müavini Temmi Brüs bildirib.

"Bəli, o bunu edə bilərdi və hazırda məhz bu istiqamətdə danışıqlar aparılır. Mənə məlumdur ki, prezident BMT-ni yüksək qiymətləndirir və onun potensialını dərk edir", - o, BMT-nin bu məsələdəki mümkün rolu ilə bağlı suala cavab verərkən bildirib.

Brüsün sözlərinə görə, "ümumi maraq" var və bu, xüsusən ondan ibarətdir ki, Hörmüz boğazı təchizat zəncirləri, dünya iqtisadiyyatı və əlaqəli sahələr üçün əsas əhəmiyyət kəsb edir.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.